امام حسین علیہ السلام کا مدینہ سے سفر ایک عظیم انسانی تمدن کی تشکیل کا نقطہ آغاز

خیبر تجزیاتی ویب گاہ: کچھ لوگ یہ سوچتے ہیں کہ امام حسین علیہ السلام نے ۲۸ رجب کو سفر اس لئے کیا کہ یزید کی بیعت کے انکار  کے بعد کوئی چارہ کار نہیں تھا لہذا آپ نے خاموشی کے ساتھ مدینہ کو ترک کر دیا کہ یزید کی بیعت کا سوال یزید کی طرف سے ہو چکا تھا اور مدینہ میں رہنا آپ کے لئے خطرہ سے خالی نہیں تھا ،  آپکو اپنی جان کا خوف تھا لہذا آپ نے خاموشی کے ساتھ  مدینہ سے نکل جانا ہی بہتر سمجھا جو لوگ اس طرح کی باتیں کرتے ہیں اگر خود امام حسین علیہ السلام کے سفر کی کیفت کو دیکھ لیں تو اندازِ سفر بتائے گا کہ ہرگز امام حسین علیہ السلام کے مقصد سفر پر  انکی توجہ نہیں گئی ہے سب سے پہلی بات تو یہ ہے کہ آپ نے خاموشی سے سفر نہیں کیا اسکی دلیل یہ ہے کہ پورا قافلہ  لیکر آپ نکلے ہیں  ایسا قافلہ جس میں ۲۵۰ گھوڑے ہیں ۲۵۰ ناقے ہیں جن میں ۷۰ ناقے تو وہ ہیں جن پر خیموں کے پردے  ، طنابیں ، اور خیموں سے متعلق صرف ساما ن لدا ہوا تھا  ۴۰ ناقے وہ تھے جن پر برتن اور دیگر گھریلو وسائل اور اسلحے وغیرہ تھے ۳۰ ناقوں پر پانی کی مشکیں تھیں جبکہ ۱۲ ناقے وہ تھے جن پر لباس وغیرہ تھے ۵۰ ناقے وہ تھے جن پر ہودج ، اور مخدرات عصمت و طہارت کے استعمال کے وسائل تھے [۱] اتنے بڑے قافلہ کا خاموشی کے ساتھ نکلنا نا ممکن تھا دوسری بات یہ ہے کہ آپ نے کسی تاریک راستہ کا انتخاب نہیں کیا اور آپ کو مشورہ دینے والوں نے مشورہ بھی دیا کہ آپ بھی ویسے ہی مدینہ سے نکل جائیں جس طر دیگر عبداللہ بن زبیر وغیرہ نے کیا لیکن آپنے واضح طور پر اعلان کر دیا میں ہرگز ایسا نہیں کرونگا اس کا مطلب اتنا تو واضح ہے کہ امام حسین علیہ السلام مدینہ سے کسی ڈر اور خوف کی وجہ سے نہیں نکلے اور نہ ہی بیعت ِ یزید سے بچنے کے لئے نکلے  اور نہ محض بیعت اس سفر کی مکمل علت ہے البتہ یہ ضرور ہے کہ امام حسین علیہ السلام ایک مناسب موقع کی تلاش میں تھے اور وہ سوال ِ بیعت کی صورت آپ کو مل گیا لہذا آپ نے واضح طور پر پہلے تو انکار بیعت کیا اور اتنا انتظار کیا کہ لوگوں میں بات مشہور ہو جائے کہ امام حسین علیہ السلام نے بیعت سے انکار کر دیا ہے اور اسکے بعد مدینہ کو چھوڑنے کافیصلہ کر لیا گو کہ لوگوں کو ایک اشارہ دیا اب یہ وقت مدینہ میں محفوظ بیٹھنے کا نہیں بلکہ کربلا سجا نے کے عزم کے ساتھ اٹھ کر یزیدی نظام حکومت کے خلاف قیام کا وقت ہے.
لہذا کہا جاسکتا ہے امام حسین علیہ السلام نے محض سوال ِ بیعت کی بنا پر مدینہ نہیں چھوڑا بلکہ ظالمانہ حاکمیت  کے خلاف آپ پہلے سے ہی قیام کا ذہن بنا چکے تھے سوال ِ بیعت اتنا ضرور کیا کہ آپ کو وہ موقع فراہم کر دیا  جو آپ کے سفر کا نقطہ آغاز بنتا اور آپ نے مدینہ سے مکہ کی طرف ہجرت کے ذریعہ کربلا کی تعمیر کی صورت اسکا آغاز کر دیا  ۔
اہتمام سفر
امام حسین علیہ السلام کا سفر ایک تاریخی حادثہ نہیں ہے جس طرح کربلا ایک تاریخی حادثہ نہیں ہے بقول رہبر انقلاب اسلامی ” کربلا ایک تاریخی حادثہ نہیں ایک تمدن ہے ایک ایسی تہذیب سے عبارت ہے جس نے  دائمی تحریک کی صورت  امت اسلامی کے لئے سرمشق کا کام کیا ہے [۲] اورکربلا کا  عظیم تمدن  کا وارث ہونا   ایک لازوال تہذیب کا  ترجمان ہونا امام حسین علیہ السلام کے اہتمام سفر سے واضح و آشکار ہے  سفر  کے آغاز میں جن شخصیتوں کو آپ نے اپنے ہمراہ لیا ہے اور جس انداز سے عظیم اسلامی تمدن کے ارکان کو ۷۲ جانثاروں کے صورت سجایا ہے وہ اس کی نظیر نہیں ملتی لہذا ایک نظر آپ کے ہمراہ جانے والوں پر ڈالیں تو بہت کچھ پتہ چل جاتا ہے کہ آپ مدینہ سے کیوں نکل رہے تھے ، کیامحض یہ ڈر اور خوف تھا یا پھر ایک لازوال تمدن کی تشکیل کے لئے ضروری عناصر کو اپنے دور اندیشی اور حکمت عملی کے تحت ساتھ لینا تھا  جب ہم آپ کے سفر  کی تاریخ اور سفر میں ساتھ جانے والے افراد پرنظر ڈالتے ہیں تو نظر آتا ہے کہ  ۲۸   رجب کو ۶۰ ہجری میں امام حسین علیہ السلام نے مدینہ سے مکہ کا قصد کیا [۳] ایک قول کے مطابق آپ ۲۹ رجب المرجب کی رات مدینہ سے نکل گئے [۴] اس سفر میں روایات کے مطابق آپکے ہمراہ عقیلہ بنی ہاشم جناب زینب سلام اللہ علیہا جناب ام کلثوم، حضرت عباس ع   جناب علی اکبر  اورآپکے دیگر اہل خانہ موجود تھے جناب زینب سلام اللہ علیہا اور جناب ام کلثوم کو ملا کر آپکے ۱۳ بہنیں اس سفر میں آپ کے ساتھ تھیں ، اہل حرم میں جناب زیننب و ام کلثوم سلام اللہ علیہا کے علاوہ امیر المومنین علیہ السلا کی بہن جمانہ بنت ابوطالب ع اور ۹ کنیزیں آپ کے ہمراہ مدینہ سے  نکلے ، اس چھوٹے سے قافلے میں امام حسن مجتبی علیہ السلام کی بعض  زوجات کے علاوہ ۱۶ افراد وہ تھے جنکا تعلق جناب امام مجتبی علیہ السلام و خانوادہ جناب مسلم بن عقیل سے تھا اصحاب ِ با وفا کے علاوہ ۱۰ غلام بھی آپکے ہمراہ تھے [۵]
مرگ معاویہ اور سوال بیعت
تاریخ کہتی ہے  رجب کی درمیانی تاریخوں میں اور بنا بر نقلے ماہ رجب کے اختتام سے آٹھ دن قبل امیر شام ہلاک ہوا اور اسکا بیٹا تخت حکومت پر بیٹھا یزید نے حکومت سنبھالتے ہی والی مدینہ کو خط لکھا کہ امام حسین علیہ السلام ، عبد اللہ بن عمر عبد اللہ بن زبیر اور عبد الرحمن بن ابی بکر سے بیعت لے لو یا انکے سروں کو میرے لئے بھیج دو ، یہ وہ مقام ہے جہاں مدینہ کے والی ولید نے مروان سے پوچھا کہ کیا کیا جائے تو مروان نے کہا قبل اس کے کہ یہ افراد حاکم شام کی موت سے باخبر ہوں انہیں بلا لو ، چنانچہ رات ہی میں ولید نے اپنا آدمی  امام حسین علیہ السلام کے پاس بھیج دیا ، آپ اس وقت اپنے نانا کے مرقد پر تھے جب ولید کی طرف سے پیغام امام حسین علیہ السلام کو پہنچا تو آپ نے فرمایا: میں گھر جا کر جلد ہی ولید کے پاس پہنچونگا [۶]
اس مقام پر دیگر ان افراد کی گفتگو قابل غور ہے جن سے یزید نے بیعت کا مطالبہ کیا تھا چنانچہ امام حسین علیہ السلام کے یہ کہنے کے بعد عمر بن عثمان جو ولید کی جانب سے پیغام لیکر آیا تھا پلٹ گیا  ، اب جن لوگوں کوبلایا گیا تھا امام حسین علیہ السلام کے علاوہ سب کی گھبراہٹ و پریشانی دیکھنے لائق تھی  عبد اللہ بن زبیر نے کہا : یا اباعبد اللہ ولید کی جانب سے آنے والے بے ہنگم پیغام نے مجھے پریشان کر دیا ہے آپ کیا سوچ رہے ہیں کیا فیصلہ کیا ہے ؟ امام حسین علیہ السلام نے معاملہ کی نزاکت کو فورا بھانپ کیا اور فرمایا: میرا گمان ہے کہ امیر شام ہلاک ہو گیا ہے اور ولید نے ہمیں یزید کی بیعت کے لئے بلایا ہے  [۷] امام حسین علیہ السلام کی جانب سے یہ خبر سنائے جانے کے بعد  عبداللہ بن عمر اور عبد الرحمن بن ابی بکر کا رد عمل یہ تھا کہ انہوں نے کہا ہم اپنے گھروں کو جاتے ہیں اور دروازہ خود پر بند کر لیں گے جبکہ ابن زبیر نے کہا ہرگز میں یزید کی بیعت نہیں کرونگا ، لیکن ان میں سے کوئی ایسا نہ تھا جو ولید کے دربار میں پہنچ کر اس سے پوچھتا  کہ تونے کیوں بلایا ہے ؟ یا ہمارا موقف یہ ہے کہ ہم بیعت نہ کریں گے  صرف امام حسین علیہ السلام تھے جنہوں نے کہا مجھے  ولید کے پاس جانا ہی ہوگا اسکے علاوہ چارہ کار ہی نہیں ہے [۸] آپ بیت الشرف میں آئے اور تیس لوگوں کو اپنے ساتھ لیا جنہوں نے اسلحوں کو ساتھ باندھا انہیں لیکر چلے اور کہا کہ تم لوگ باہر ہی رکو اگر میری آواز بلند ہو جائے تو اندر آ جانا  شیخ مفید نے ارشاد میں ولید کے دربار میں جاتے ہوئے امام حسین کی جانب سے کچھ مسلح جوانوں کو لیکر چلنے کے سلسلہ سے لکھا ہے :
امام حسین علیہ السلام کو جب معاملہ کا پتہ چلا تو آپ نے اپنے نزدیکی ساتھیوں کو حکم دیا کہ اپنے اسلحوں کو اٹھا لیں اور کہا کہ ولید نے مجھ سے اس قسم کی درخواست کی ہے جسے لیکر میں آسودہ خاطر نہیں ہوں وہ مجھے ایسے کام پر مجبور کرےگا جسے میں قبول نہیں کر سکتا اور میں اس سے محفوظ نہیں ہوں لہذا تم لوگ میرے ساتھ چلو اور دروازے کے باہر ٹہر جاو اگر میری آواز بلند ہو جائے تو اندر چلے آنا [۹]۔
اسکے بعد  امام حسین علیہ السلام ولید کے دربار پہنچے آپ نے دیکھا کہ مروان بھی وہیں بیٹھا ہے ، ولید نے امیر شام کی ہلاکت کی خبر دی آپ نے کلمہ استرجاع زبان پر جاری کیا ،اس کے بعد ولید نے یزید کے مکتوب کے بارے میں بتایا کہ آپ سے یزید نے بیعت کا مطالبہ کیا ہے یہ وہ مقام ہے جہاں امام حسین علیہ السلام نے فرمایا : مجھے نہیں لگتا کہ تو خفیہ طریقے سے میری بیعت پر راضی ہو بلکہ تو یہی چاہے گا کہ میں یزید کی بیعت علنی طور پر لوگوں کے سامنے کروں [۱۰] ولید نے کہا جی ایسا ہی ہے جیسا آپ نے فرمایا   تو آپ نے جواب دیا   پس صبح تک صبر کر اور اس بارے میں اپنی رائے کو دیکھ [۱۱] ولید نے کہا آپ جائیے یہاں تک کے ہم لوگوں کے درمیان آپ سے ملاقات کریں  اس مقام پر  مروان نے کہا  ، اس وقت انہیں مت جانے دے ، اگر ابھی حسین ع کا ہاتھ بیعت کے لئے نہ لے سکا تو کبھی ایسا نہیں ہوگا  مگر یہ کہ دونوں طرف سے بہت خون بہے گا ابھی اگر بیعت نہ کریں تو سر قلم کر دے ، یہ وہ مقام ہے جہاں آپ مروان کی گستاخی پر سخت غضباک ہوئے اور آپ نے فرمایا :  ائے نیگوں چشم ماں کے بیٹے تو مجھے قتل کرے گا خدا کی قسم تو جھوٹا ہے[۱۲] نہ تجھ میں طاقت ہے اور نہ اس میں طاقت ہے  اسکے بعد آپ نے یہ تاریخی جملے  ارشاد فرمائے :
ہم اہلبیت نبوت ہیں ، معدن رسالت ہیں ملائکہ ہمارے آتے جاتے ہیں ، خدا نے خلقت پر ہمیں مقدم کیا ہے اورہم پر ختم کیا ہے  اور یزید شراب پینے والا فاسق لوگوں کو ناحق قتل کرنے والا  علنا فسق وفجور کرنے والا ہے مجھ جیسا اس جیسے کی بیعت نہیں کر سکتا لیکن تو بھی صبح کرے گا ہم بھی کریں گے تو بھی دیکھے گا ہم بھی دیکھیں گے کہ ہم مین خلافت او ربیعت کا زیادہ حقدار کون ہےیہ کہہ کر امام علیہ السلام اپنے چاہنے والوں کے ساتھ باہر نکل گئے [۱۳] تاریخ کہتی ہے ماہ رجب کے تین دن بچے تھے جب آپ نے یہ اقدام کیا۔
جب صبح ہوئی تو امام حسین علیہ السلام گھر سے نکلے  مدینہ کے ایک کوچےمیں مروان سے سامنا ہوا مروان نے کہا ائے ابا عبد اللہ آپ کو نصیحت کرتا ہوں میری نصیحت کو قبول کر لیں ، امام علیہ السلام نے فرمایا: تیری نصیحت کیا ہے ؟ مروان نے کہا یزید کی بیعت کر لیں آپ کے لئےدنیا و آخرت میں بہتری کا سبب ہے  امام علیہ السلام نے کلمہ استرجاع جاری کرتےہوئے فرمایا  جب امت پر یزید جیسے حاکم مسلط ہو جاءیں تو اسلام پر سلام ہو میں نے اپنے جد رسول اللہ صلی اللہ علیہ وآ لہ وسلم سےسنا ہے کہ آپ نے فرمایا: آل سفیان پر خلافت حرام ہے۔ [۱۴]
اسکے بعد آپ نے مدینہ کو ترک کرنے کا فیصلہ کر لیا اور اپنے نانا کے مزار پر آئے اور دو شب آپ اپنے نانا کے مزار پر ہی تا دیر رہے تاریخ میں آپ کی اپنے نانا سے گفتگو نقل ہوئی ہے اسکے بعد آپ نے مدینہ کو چھوڑ دیا۔ [۱۵]
امام علیہ السلام کی جانب سے  مکہ کی طرف ہجرت میں ایک اہم بات مکہ تک جانے والی اصلی شاہراہ کا انتخاب ہے جو اس بات کی دلیل ہے کہ امام حسین علیہ السلام نے خوف و ڈر سے ایسا نہیں کیا بلکہ اسکی حکمت کچھ اور تھی اور امام لوگوں تک پیغام پہنچانا چاہتے تھے کہ میں کسی کے خوف سے مدینہ کو ترک نہیں کر رہا ہوں ورنہ چھپنے چھپاتے نکلتا بلکہ ایک عظیم مقصد کو لیکر چل رہا ہوں جبکہ لوگوں نے آ پ کو رائے دی تھی کہ آپ خاموشی سے پوشیدہ طور پر کسی اور راستہ سے نکل جائیں جس طرح عبد اللہ ابن زبیر نے کیا لیکن امام علیہ السلام نے منع کر دیا۔ [۱۶]
لوگوں کے نظریں ظاہری سفر اور ظاہری اسباب کو دیکھ رہی تھیں جبکہ امام علیہ السلام کی نظریں ایک عظیم تمدن کی تشکیل کو دیکھ رہی تھیں جو مدینہ سے اس طرح آپ کے نکلنے کے ساتھ ہی  تشکیل پانا شروع ہو گیا اور دوران سفر آپ کے خطبات ، مکہ میں آپ کے خاص انداز گفتگو خاص کر خطبہ منی  و منازل کربلا میں آپکے بیانات کی روشنی میں بارور ہوتا ہواعصر عاشور آپ اور آپ کے با وفا اصحاب کی شہادت پر تمام ہوا اور آج تک باقی ہے  اور جہاں جہاں بھی یزیدیت کے مظالم ہیں وہاں وہاں  گلشن شہادت میں اسی تمدن کے پھول کھلتے نظر آ رہے ہیں چاہے وہ ارض شام ہو ، بحرین  ویمن ہو عراق ہو یا فلسطین  ہر جگہ ایک ہی نعرہ ہے ہیات منا الذلہ ۔۔۔
حواشی:
[۱]۔ مدینہ سے مدینہ ص ۷۷ ص ۹۰ تفصیل کے لئے ملاحظہ ہو ، بیت الاحزان ، عبد الخالق بن عبد الرحیم یزدی، مقتل الحسین ، ابو مخنف، تاریخ ابن اعثم کوفی وغیرہ
[۲]  ۔http://farsi.khamenei.ir/speech-content?id=34556
[۳] ۔ ارشاد، جلد ۲ ص ۳۴، اعلام الوری ، جلد ۱ ص ۴۳۵، بحار الانوار، جلد ۴۴ ص ۳۲۶، روضہ الواعظین ، ص ۱۷۱، مقتل الاحسین ، ص ۷ ، تاریخ طبری، جلد ۴ ص ۲۵۲
[۴]  ۔ فیض العلام ، ص ۳۲۹
[۵] ۔ تقویم شیعہ، ص ۲۲۴
[۶]  ۔ سوف أذهب إلیه بعد ذهابی الى البیت ، منتهى الآمال فى تواریخ النبى و الآل علیهم السلام (فارسى)، جلد ‏۲، صفحه ۶۹۹ – ۶۹۸
[۷]  ۔ «أظنّ أنّ طاغیتهم قد هلک فبعث إلینا لیأخذنا بالبیعة لیزید، منتهى الآمال فى تواریخ النبى و الآل علیهم السلام (فارسى)، جلد ‏۲، صفحه ۶۹۹ – ۶۹۸
[۸]  ۔ «لا حیلة لنا الّا الذهاب ایضا
[۹]  ۔ الإرشاد ترجمه رسولى محلاتى، جلد ‏۲، صفحه ۳۰
[۱۰]  ۔ انّی لا أراک تقنع ببیعتی لیزید سرّا حتى أبایعه جهرا فیعرف ذلک الناس، منتهى الآمال فى تواریخ النبى و الآل علیهم السلام(فارسى)، جلد ‏۲، صفحه ۷۰۰ – ۶۹۹ – منتهى الآمال فى تواریخ النبى و الآل علیهم السلام(عربی)، جلد ‏۱، صفحه ۵۵۵ – ۵۵۴
[۱۱]  ۔ فتصبح و ترى رأیک فی ذلک،  ایضا
[۱۲]  ۔ یا ابن الزرقاء ویل لک أ أنت تأمر بضرب عنقی و قتلی أم هو؟ کذبت و اللّه و لؤمت: یا بن الزّرقاء ایضا
[۱۳]  ۔ ایّها الامیر انّا أهل بیت النبوة و معدن الرسالة و مختلف الملائکة و بنا فتح اللّه و بنا یختم و یزید رجل فاسق شارب الخمر قاتل النفس المحرّمة معلن بالفسق و مثلی لا یبایع بمثله و لکن نصبح و تصبحون و ننظر و تنظرون أیّنا أحقّ بالخلافة و البیعة، ثم خرج (علیه السّلام) مع اصحابه و موالیه ، ایضا
[۱۴]  ۔ انّا للّه و انّا إلیه راجعون و على الاسلام السلام اذ قد بلیت الامة براع مثل یزید و لقد سمعت جدّی رسول اللّه (صلّى اللّه علیه و آله) یقول: الخلافة محرّمة على آل أبی سفیان. ایضا
[۱۵]  ۔ فخرج الحسین [علیه السّلام‏] من تحت لیلته هذه [الثانیة] و هی لیلة الأحد لیومین بقیا من رجب سنة ستّین [من الهجرة] ببنیه و إخوته و بنی أخیه و جلّ أهل بیته، إلا محمد بن الحنفیّة و هو یتلو هذه الآیة: :« فَخَرَجَ مِنْها خائِفاً یَتَرَقَّبُ قالَ رَبِّ نَجِّنِی مِنَ الْقَوْمِ الظَّالِمِین (سوره مبارکه قصص، آیه ۲۱)» فلمّا دخل مکّة تلا هذه الآیة: «وَ لَمَّا تَوَجَّهَ تِلْقاءَ مَدْیَنَ قالَ عَسی رَبِّی أَنْ یَهْدِیَنِی سَواءَ السَّبِیلِ.(سوره مبارکه قصص ، زندگانى چهارده معصوم علیهم السلام (ترجمه إعلام الورى) ، صفحه ۳۱۷
[۱۶]  ۔ ترجمه مقتل مقرم، صفحه ۶۰